::• اخبار الكورة المصرية•::
كالعادة شربناها سادة ومن غير بن كمان " قرف ، زهق ، ملل ، خنقة ، برود ، تناحة " هو ده شعار الزمالك هذا الموسم في مجال كرة القدم ، فعلا احنا مابنكدبش الزمالك اصبح حصالة الفرق في الدوري ومطمع احقر فرق الدوري كمان واصغرها ، ايه تاني ؟! ايه اللي فاضل ؟! خلاص مفيش صحة بجد والله خلاص تعبنا نسافر ونروح ونيجي خلاص مفيش صحة مفيش فلوس مفيش فايدة في فرقة عديمة الفايدة زي الزمالك
الزمالك طول عمره بيكسب الاسماعيلي رايح جاي في اسوء احواله لكن خلاص كسرنا القاعدة الحمد لله وبعد 45 عام من الانجازات كسرنا اخر الارقام القياسية العام السابق ان الدراويش تفوز علينا ذهاب واياب ونؤكدها هذا الموسم
كالعادة ولعنا النار والاهلي وقع وفرحنا وجينا نقول خلاص بقى الزمالك شاف الاهلي بيوقع يقوم هو ويدي الكل بالجذمة ويقول انا الزمالك على حق ، ومن حقي ان ارفع علمي فوق الجميع واسعد جماهيري الحزينة واجعل لها كرامة مصونة وسط الجماهير كجماهير نادي ملكي ، كجماهير نادي بطولات
لكن لا الزمالك صعب عليه الاهلي فقال اقع معاه واتنيل معاه واخسر يوم هو بس ما يتعادل ، هو عيب اني اكسب عيب اني افرح جماهيري عيب اني اسعد مدربيني عيب اني ادخل الابتسامة على وشش عفنت من البكا
حرام بمعنى كلمة حرام جبنا اخرنا وخسرنا صحتنا وراء فريق لايستاهل انه نروح وراه 5 متر حتى فريق عاجز ، فكل فرق النادي تحقق انجازات اشمعنى كرة القدم فيه ايه ؟؟!! انا مش فاهم
مرة عيب مدرب ، جبنا مدرب كبير زي هنري ميشيل ، الادارة مانفذتش اومره الفنية واجبرت عليه لاعيبه بالعافية عشان هما الكبار وفي الاخر برضوا مشوا بس اما مشوا المدرب زي حازم وطارق و بشير ، طب ماكانوا مشوا من الاول يا بني ادميين وللا انا بقول كلام غلط حد يرد عليا
احنا ليه كجمهور محدش حاسس بينا زي مابتدوا الملايين للاعيبه زبالة بجد مش فالحين غير انهم عايزين وعايزين و عايزين .. احنا فين من كل ده ؟؟!! اللاعيبه اللي بتاخد الفلوس دي كلها ليه مش حاسة انها كده بتاكل فلوس حرام مش من حقها هما ايه ؟! مفيش دم ؟! مفيش احساس ؟! مفيش انتماء للنادي اللي عمل منم حاجة من لا شئ ؟! ً
نعمل ايه غيرنا كام ادارة في ال4سنين؟! ومفيش فايدة وغيرنا كام مدرب وبرضوا زي قلته ؟! وغيرنا ال11لاعيب ومفيش فايدة ؟!
انتوا مش حاسين ان لاعيبه الزمالك 5 في المنتخب الاول و5 في منتخب الشباب اللي هايلعب كأس العالم للشباب القادمة ، يعني منتخب مصر يا بني ادمين ، والله احنا احسن من الاهلي مليون مرة ومن الاسماعيلي 2 مليون مرة
ايه تاني ، مفيش غير الانتخابات يا عم حسن صقر نترجاك رأفة بالجماهير الحزينة الانتخابات ولا شئ سوى الانتخابات ، ونترجى ادارة الزمالك الحالية ، هنري ميشيل ، هنري ميشيل ، هنري ميشيل هو المدرب الاصلخح والذي قال لابد من استبعاد الكبار الان انتم نفذتوا كلامه فلماذا عاندتوه ؟! لا اعرف ولا احد يعرف ونحن لا نعرف
واذا لم يتم ذلك فورا فسيكون مصير الزمالك هو الفناء وجماهيره العناء ، وبعد ذلك فالتنتهي قصة الزمالك يا حكومة الاهلي للأبد ...
كتب هشام اشرف
